Konferenza stampa
Adattat għal:
It-tipi kollha ta’ organizzazzjonijiet.
X’inhi?
Konferenza għall-istampa sservi biex tikkomunika aħbarijiet importanti (eż. it-tnedija tal-kampanja) marbuta ma’ organizzazzjoni jew kumpanija u tinvolvi l-parteċipazzjoni ta’ ġurnalisti u rappreżentanti tal-kumpanija/organizzazzjoni. L-avveniment joffri lill-ġurnalisti forum interattiv biex isiru jafu dwar l-organizzazzjoni u l-kampanja tiegħek.
Benefiċċji
- Tippermettilek tipprovdi lil ġurnalisti ħafna aktar informazzjoni milli permezz ta’ stqarrija għall-istampa u
- Tipprovdi lill-ġurnalisti l-opportunità li jistaqsu mistoqsijiet u jorganizzaw intervisti.
Limitazzjonijiet
- L-organizzazzjoni ta’ konferenza stampa tista’ tinvolvi spejjeż konsiderevoli (il-kiri ta’ post, eċċ.).
Kif tippjana l-konferenza stampa tiegħek
Ippjana minn qabel u kkunsidra dan li ġej:
- Aħseb minn qabel dwar kwistjonijiet prattiċi bħall-post u r-riżorsi (skrivanija, podju, kelliema, mikrofoni, eċċ.)
- Ara li tkun taf xi trid tħabbar
- Ara li tkun taf lil min trid tinvolvi sabiex iżżid l-influwenza u l-kredibbiltà tal-messaġġ tiegħek. Xi ħadd mill-organizzazzjoni tiegħek għandu jkun wieħed mill-kelliema, possibbilment kelliem anzjan u li jokkupa pożizzjoni għolja.
- Ipprepara lista ta’ mistoqsijiet u tweġibiet għall-kelliema tiegħek
- Ipprepara minn qabel l-affarijiet kollha li se jitqassmu: dossiers għall-istampa, rigali, eċċ Tħallix dan għall-aħħar minuta!
Skedar
- Alloka siegħa u agħti spazju lil żewġ kelliema ewlenin jew tlieta
- Konferenzi stampa filgħodu jew kmieni wara nofsinhar huma l-aktar effettivi. Il-ġurnalisti għandhom it-tendenza li jippreżentaw l-istejjer tagħhom filgħaxija u mhux se jkollhom il-ħin biex jattendu għal konferenza stampa.
- Evita li torganizza konferenza stampa nhar ta’ Ġimgħa peress li xi gazzetti jkollhom ċiklu tal-aħbarijiet differenti matul tmiem il-ġimgħa.
Kif tibgħat l-istedina
Tista’ tibgħat kmieni lill-midja magħżula messaġġ biex tħalli d-data libera, possibbilment ġimagħtejn qabel il-konferenza, iżda ibgħat l-istedina propja ġimgħa qabel, u tfakkira ta’ malajr il-jum ta’ qabel.
